गडचिरोलीत स्टीलनिर्मिती  करून  जगात नवा अध्याय लिहिला जात  आहे  ! * Lloyds Metals and Energy Ltd चे व्यवस्थापकीय संचालक बी. प्रभाकरन * नागपूर  येथे आयोजित IIM Nagpur Media Conclave 2026

AVB NEWS गडचिरोली :-  गडचिरोलीत आपल्या प्रवासाच्या सुरुवातीच्या काळातील आव्हानांची आठवण करून देताना प्रभाकरन यांनी सांगितले की, त्या काळात गडचिरोली नक्षलवादी विचारसरणीने प्रभावित होता आणि त्यामुळे या भागाच्या विकासाला अडथळा निर्माण झाला होता.  “मला गडचिरोलीच्या मातीत संधी दिसली आणि आज त्याचे उत्तम परिणाम दिसत आहेत. स्टीलनिर्मितीच्या जगात ही एक नवी कथा लिहित आहे. टाटा समूहाने अनेक दशकांपूर्वी येथे असलेल्या संभाव्यता ओळखल्या होत्या; मात्र लॉजिस्टिक्सशी संबंधित अडचणी आणि कठीण भौगोलिक परिस्थितीमुळे त्यांनी हे काम पुढे नेले नाही. मी या ठिकाणाची क्षमता ओळखली आणि आत्मविश्वासाने पुढे गेलो.” असे प्रतिपादन  Lloyds Metals and Energy Ltd चे  व्यवस्थापकीय संचालक बी. प्रभाकरन  यांनी केले

Media, Leadership and the New World Order’ या विषयावर भारतीय व्यवस्थापन संस्था नागपूर (IIM Nagpur) येथे आयोजित IIM Nagpur Media Conclave 2026 मध्ये प्रभाकरन  बोलत होते. कार्यक्रमाला प्रमुख अतिथी प्रमुख  केंद्रीय रस्ते वाहतूक आणि महामार्ग मंत्री नितीन गडकरी उपस्थित होते.

विद्यार्थ्यांना संबोधित करताना प्रभाकरन यांनी केवळ कार्यकारी पदांपुरते स्वतःला मर्यादित न ठेवता उद्योजकतेकडेही करिअरचा एक पर्याय म्हणून पाहण्याचे आवाहन केले. भारताची राष्ट्रीय अर्थव्यवस्था मजबूत करण्यासाठी देशातील संसाधनांचा उपयोग करण्याची गरज असून, संधींच्या शोधात परदेशात जाण्याऐवजी देशातील संधींचा उपयोग करावा, असे त्यांनी सांगितले.

प्रभाकरन म्हणाले की, भारताची देशांतर्गत मागणी इतकी मोठी आहे की देशात मोठ्या प्रमाणावर उत्पादन टिकवून ठेवणे शक्य आहे. आपल्याला निर्यातदार होण्याची गरज नाही. आपल्या देशाची गरज इतकी मोठी आहे की आपण जे काही उत्पादन करतो, ते देशातच वापरले जाऊ शकते. इंजिनीअरिंगचे शिक्षण पूर्ण केल्यानंतर मला अमेरिकेत काम करण्याची मोठी संधी मिळाली होती. मात्र, माझ्या आजोबांनी ‘आपल्या मुळांशी जोडलेले राहा आणि सर्वप्रथम देशासाठी काम करा’, असा दिलेला सल्ला मला आज या ठिकाणी पोहोचविण्यात महत्त्वाचा ठरला.”

आपल्या उद्योजकीय प्रवासाची आठवण सांगताना प्रभाकरन यांनी सांगितले की, त्यांनी 10,000 रुपयांपासून सुरुवात केली आणि त्यानंतर जगभर प्रवास करून कमोडिटी क्षेत्रात काम केले. भारत हा जगातील सर्वात मोठ्या कमोडिटी ग्राहकांपैकी एक राहील, या विश्वासाने त्यांना सातत्याने प्रेरणा दिली.

“आज भारत तांबे असो किंवा सोने, प्रत्येक गोष्ट आयात करतो. मात्र Lloyds हे चित्र बदलत आहे. आम्ही त्या दिशेने काम करत आहोत आणि आंध्र प्रदेशातील जोंनागिरी येथे भारतातील पहिली खासगी सोन्याची खाण सुरू केली आहे.”भारताच्या तरुणांच्या क्षमता आणि नवोन्मेषाच्या शक्तीवर ठाम विश्वास व्यक्त करत प्रभाकरन म्हणाले की, त्यांच्या संस्थेसमोरील अनेक आव्हानांचे निराकरण 30 वर्षांखालील कर्मचाऱ्यांनी केले आहे.ते म्हणाले, “माझ्या बहुतेक समस्यांचे निराकरण माझ्यासोबत काम करणारे 30 वर्षांखालील लोक करतात. म्हणूनच मी त्यांना कधीही कर्मचारी मानत नाही, तर माझे भागीदार मानतो.”

गडचिरोलीतील तरुणांमध्ये शिक्षण आणि कौशल्य विकासाला प्रोत्साहन देण्यासाठी राबविण्यात येत असलेल्या उपक्रमांवरही प्रभाकरन यांनी प्रकाश टाकला. गडचिरोली येथील University Institute of Technology (UIT) चे विद्यार्थीही या मीडिया कॉन्क्लेव्हमध्ये सहभागी झाले होते.

प्रभाकरन म्हणाले, “त्यांना सर्वोत्तम तांत्रिक शिक्षण मिळावे यासाठी आम्ही ही संस्था सुरू केली. विद्यार्थ्यांनी खाणकामाच्या क्षेत्रात शिक्षण घेऊन अधिकाधिक कौशल्य आणि तज्ज्ञता मिळवावी आणि ती गडचिरोलीत परत आणावी, यासाठी आम्ही त्यांना ऑस्ट्रेलियातही पाठवले आहे.”

कार्यक्रमात IIM नागपूरचे संचालक डॉ. भीमराया मेट्री यांनी भारताच्या आर्थिक प्रगतीवर प्रकाश टाकत देश जगातील सर्वात मजबूत अर्थव्यवस्थांपैकी एक बनण्याच्या दिशेने वेगाने वाटचाल करत असल्याचे सांगितले.

कार्यक्रमाला प्रेस ट्रस्ट ऑफ इंडिया (PTI) चे मुख्य कार्यकारी अधिकारी आणि प्रधान संपादक विजय जोशी, Business Standard चे संपादकीय संचालक ए. के. भट्टाचार्य तसेच Blitz India Media Group चे अध्यक्ष आणि प्रधान संपादक दीपक द्विवेदी यांच्यासह इतर मान्यवर उपस्थित होते.