नगराध्यक्ष, नगरसेवक कोण ? उद्या निवडणूकीचा निकाल  * नगराध्यक्षासाठी २३ तर नगरसेवकसाठी ३३९ उमेदवारांचा निकाल होणार स्पष्ट ** जिल्हाधिकारी अविश्यांत पंडा यांचेकडून स्ट्राँग रूम व मतमोजणी व्यवस्थेचा आढावा

AVB NEWS गडचिरोली : जिल्ह्यातील गडचिरोली, देसाईगंज व आरमोरी या तीन नगरपरिषदांच्या सार्वत्रिक निवडणुकांसाठी २ व २० डिसेंबर रोजी मतदान घेण्यात आले असून २१ डिसेंबर २०२५ रोजी होणाऱ्या मतमोजणीसाठी प्रशासनाने सर्व आवश्यक तयारी पूर्ण केली आहे. मतमोजणीला सकाळी १० वाजेपासून सुरूवात होणार आहे

नगरपरिषद सार्वत्रिक निवडणुकांच्या अनुषंगाने २१ डिसेंबर रोजी होणाऱ्या मतमोजणीच्या पार्श्वभूमीवर जिल्हाधिकारी अविश्यांत पंडा यांनी आज कृषी महाविद्यालय, गडचिरोली येथे उभारण्यात आलेल्या मतमोजणी केंद्रासह मतदान यंत्रांच्या सुरक्षा कक्ष (स्ट्राँग रूम) व ईव्हीएम साठवणूक व्यवस्थेची पाहणी केली.

गडचिरोली नगरपरिषदेची मतमोजणी कृषी महाविद्यालय, सोनापूर येथे होणार असून येथे प्रत्यक्ष मतमोजणीसाठी ७ व पोस्टल बॅलेटसाठी १ असे एकूण ८ टेबल असतील. देसाईगंज नगरपरिषदेची मतमोजणी देसाईगंज नगरपरिषद सांस्कृतिक सभागृहात पार पडणार असून येथे प्रत्यक्ष मतमोजणीसाठी १० व पोस्टल बॅलेटसाठी १ असे एकूण ११ टेबल निश्चित करण्यात आले आहेत. आरमोरी नगरपरिषदेची मतमोजणी तालुका लघु पशुवैद्यकीय चिकित्सालय येथे होणार असून येथे प्रत्यक्ष मतमोजणीसाठी ३ व पोस्टल बॅलेटसाठी १ असे एकूण ४ टेबल ठेवण्यात आले आहेत.

या निवडणुकीत तीनही नगरपरिषदांमधून नगराध्यक्ष पदासाठी एकूण २३ तर नगरसेवक पदासाठी ३३९ उमेदवार निवडणूक रिंगणात होते. गडचिरोली नगरपरिषदेत नगराध्यक्ष पदासाठी ७ तर नगरसेवक पदासाठी १३१ उमेदवार, देसाईगंज नगरपरिषदेत नगराध्यक्ष पदासाठी ६ व नगरसेवक पदासाठी १०० उमेदवार, तर आरमोरी नगरपरिषदेत नगराध्यक्ष पदासाठी १० व नगरसेवक पदासाठी १०८ उमेदवारांनी निवडणूक लढवली आहे.
मतमोजणी प्रक्रिया पारदर्शक व सुरळीतपणे पार पडावी यासाठी सर्व तांत्रिक, प्रशासकीय व सुरक्षा उपाययोजना करण्यात आल्या आहेत